Газавая лямпа “Цуд”
Газавая лямпа гандлёвай маркі “Цуд” вытворчасці берлінскай кампаніі “Lampen-Fabrik Ehrich & Graetz”. Прынцып дзеяння свяцільні характэрны для лямпаў падобнага тыпу: у металічную ёмістасць залівалася газа і апускаўся кнот, іншы канец якога быў заціснуты ў гарэлцы. Кнот убіраў у сябе газу і падпальваўся. Шматлікія прарэзы ў гарэлцы забяспечвалі неабходны прыток паветра. Зверху, для лепшай цягі, а таксама, для аховы полымя ад ветру, на гарэлцы замацоўваўся шкляны камінок. З дапамогай адмысловага ключа магчыма рэгуляваць вышыню кнота і, такім чынам, яркасць асвятлення. Акрамя таго, рэгулюецца і вышыня самой лямпы. На ключы-рэгулятары вышыні кнота бачны лагатып вытворцы: два цмокі абапал сонца, ніжэй якога ініцыялы “E” і “G”.