Тэракотавая керамічная плітка
Тэракотавая керамічная плітка для абліцоўкі печы, як мяркуецца, мясцовай вытворчасці. Вонкавая пласціна кафлі аздоблена малюнкам у выглядзе герба каталіцкага ордэна кармелітаў босых: на ўвянчаным каронай шчыце адлюстравана стылізаваная гара Кармель з крыжам і трыма зоркамі. На жаль, верхняя частка кафлі захавалася дрэнна, з-за чаго амаль не бачны яшчэ адзін элемент герба – рука, якая трымае вогненны меч.
У вуглах кафлі змешчаны лацінскія літары, якіх, хутчэй за ўсё, было чатыры – па адной у кожным вугле. Літары “C” і “D” верагодна звязаны з лацінскай назвай ордэна – Ordo Carmelitarum Discalceatorum, літара “G” можа ўказваць непасрэдна на Глыбокае, дзе ў 1640-х гадах пачаў дзейнічаць адзін з буйнейшых кармеліцкіх манастыроў Вялікага княства Літоўскага.