Дзень памяці і смутку
Штогод 22 сакавіка ўся Беларусь ушаноўвае памяць загінуўшых жыхароў вёскі Хатынь і іншых населеных пунктаў на тэрыторыі нашай краіны, знішчаных карнікамі падчас Вялікай Айчыннай вайны. 22 сакавіка 1943 года нямецка-фашысцкія войскі падчас карных аперацый спалілі вёску Хатынь. У той страшны дзень былі знішчаны практычна ўсе жыхары вёскі - 149 чалавек, з іх 75 - дзеці. Створаны на месцы трагедыі мемарыяльны комплекс сімвалізуе і аб'ядноўвае сотні іншых беларускіх вёсак з падобнымі лёсамі. Успамінаючы Хатынь, мы ўспамінаем іх.
Сёння, у 81-ю гадавіну трагедыі самай вядомай вогненнай вёскі Беларусі, у сценах нашага музея сабралася неабыякавая да гістарычнага мінулага сваёй краіны грамадскасць раёна, каб яшчэ раз успомніць пра тую крывавую трагедыю. Удзельнікі дыялогавай пляцоўкі "Памятаць, каб жыць" пачулі выступленні гісторыкаў, краязнаўцаў, архівістаў аб падзеях ваенных гадоў, аб трагічным лёсе многіх беларускіх вёсак, у тым ліку Глыбоцкага раёна, знішчаных фашыстамі падчас правядзення карных аперацый. Падчас дыялогу ўзнімаліся многія гістарычныя, але ў той жа час актуальныя пытанні, адказы на які спрабавалі знайсці ўдзельнікі мерапрыемства. Бо ўсе мы сёння выдатна разумеем, шануем і памятаем пра тое, якім коштам дасталіся мір і спакой у нашай краіне.
(22 сакавіка 2024 года)
