Услед за старажытным чалавекам
У рамках музейна-педагагічнай праграмы "Музей і дзеці" для вучняў пачатковых класаў школ горада і раёна штогод супрацоўнікамі музея праводзяцца адукацыйныя мерапрыемствы. На музейных уроках дзеці пазнаюць тэхналогію апрацоўкі лёну, раскрываюць сакрэты старажытнага кавальства, знаёмяцца з ганчарным рамяством. У гэтым годзе школьнікі, разам з музейнымі супрацоўнікамі, адпраўляюцца ў археалагічна-этнаграфічнае падарожжа ўслед за старажытным чалавекам.
Вучні пачатковых класаў гарадскіх школ пазнаюць археалагічную спадчыну нашай краіны, праз інтэрактыў знаёмяцца з жыццём і заняткамі першабытнага чалавека. Як і старажытныя людзі, яны спрабуюць здабываць агонь, майстраваць вуду, разгадваць рэбусы і адказваць на складаныя пытанні віктарыны. Гульнявыя моманты спалучаюцца з адукацыйнай накіраванасцю, дзякуючы чаму музейнае мерапрыемства садзейнічае пашырэнню кругагляду малодшых школьнікаў і з'яўляецца для іх стартавай пляцоўкай у захапляльны свет гісторыі.
(сакавік-красавік 2024 года)
