Вішнёвая прыгода - 2024
Пятнічны вечар "Вішнёвага фестывалю" пачаўся з традыцыйнага квэста, які аб'яднаў глыбачан, што любяць гісторыю, краязнаўства і актыўны адпачынак.
Інтэлектуальнае гарадское арыентаванне "Вішнёвая прыгода", падрыхтаванае супрацоўнікамі музея, стала своеасаблівым вяртаннем да “класічных” музейных квэстаў. Дзевяць каманд на старце атрымалі канверты з васьмю пытаннямі, за кожным з якіх хаваўся той ці іншы аб'ект у межах Вішнёвай сталіцы. Па чарзе знаходзячы кожны з гэтых аб'ектаў, камандам было неабходна фатаграфавацца на іх фоне і адсылаць фотаздымкі арганізатарам квэста, якія ўвесь час заставаліся на сувязі з удзельнікамі. Важна было не толькі дакладна вызначыць і дабрацца да загаданых аб'ектаў, але і зрабіць гэта хутка, бо на вырашэнне ўсіх пытанняў адводзілася менш за паўтары гадзіны.
Трэба адзначыць, што ў гэты гарачы ліпеньскі вечар удзельнікі каманд знаходзілі сілы не толькі на імклівае перамяшчэнне па вуліцах і плошчах Глыбокага, але і на напружаны мазгавы штурм - што, безумоўна, з'яўляецца адной са складаючых перамогі ў інтэлектуальна-спартыўным спаборніцтве.
Як і чакалася, сваю ролю ў выніковым размеркаванні месцаў адыграла не толькі колькасць правільных адказаў, але і час, затрачаны камандамі-ўдзельніцамі на праходжанне квэста. Лепшымі сталі ўдзельнікі каманды "Сіняе полымя" з ПУ "Глыбокаегаз". «Срэбра» аказалася ў руках «Вішнёвай казкі» з дзіцячага сад №1. Трэцяе месца па праве заняла каманда «Вішнёвыя званочкі», якая прадстаўляла Глыбоцкі МКК.
Ад душы дзякуем усім удзельнікам гарадскога квэста за зацятасць і настойлівасць, праяўленыя ў гэты вечар. Жадаем вам удачы, новых адкрыццяў і яркіх перамог!
(26 ліпеня 2024 года)
