13 лістапада ў гарадскім Доме культуры ў рамках мерапрыемстваў, прымеркаваных да дня работнікаў сельскай гаспадаркі і перапрацоўчай прамысловасці аграпрамысловага комплексу, супрацоўнікі музея падрыхтавалі тэматычную пляцоўку “Жывая нітка традыцый”. У інтэр'еры сялянскай хаты былі прадстаўлены прылады працы і прыстасаванні для апрацоўкі і захоўванні збожжа (цэп, серп, ступа, веялка, сявенькі і інш.), сельскагаспадарчыя прылады, маслабойка, гліняны посуд. Асобным блокам экспанаваліся прадметы, звязаныя з апрацоўкай лёну – мялка, трапло, грабяні, калаўрот. У інтэрактыўнай форме наведнікам пляцоўкі дэманстраваліся прынцыпы працы інструментаў, у завяршэнні гасці змаглі пачаставацца традыцыйнымі беларускімі «прысмакамі».
(13 лістапада 2026 года)



6 лістапада прайшлі ўрачыстыя мерапрыемствы, прысвечаныя гадавіне Кастрычніцкай рэвалюцыі. У дворыку раённай гімназіі адбыўся ўрачысты мітынг з ускладаннем кветак да помніка Уладзіміру Леніну, пасля чаго прысутныя перамясціліся ў Глыбоцкі гісторыка-этнаграфічны музей, дзе іх увазе навуковыя супрацоўнікі падрыхтавалі гістарычны агляд “Кастрычніцкая рэвалюцыя. Старонкі гісторыі».
Гэта мерапрыемства – не проста лекцыя аб падзеях мінулай эпохі. Прысутныя змаглі дакрануцца да матэрыяльных сімвалаў савецкага часу, паразважаць аб значэнні рэвалюцыйных падзей для сучаснай Беларусі, адказаць на пытанні тэматычнай віктарыны.
У гістарычным аглядзе прынялі ўдзел прадстаўнікі розных пакаленняў глыбачан, і кожны вынес нешта сваё: нехта панастальгіраваў аб савецкай маладосці, нехта ўспомніў сябе піянерам з чырвоным гальштукам, а нехта ўпершыню даведаўся пра цікавыя факты з савецкага перыяду нашай з вамі гісторыі.
(7 лістапада 2026 года)



4 лістапада ў выставачнай зале музея адбылося ўрачыстае адкрыццё часовай экспазіцыі "Глыбоцкая кераміка". На мерапрыемства былі запрошаны прадстаўнікі грамадскіх арганізацый, маладзёжны актыў раёна, народныя майстры, рамеснікі. Стварэнне часовай экспазіцыі - вынік плённага супрацоўніцтва нашага музея з Беларускім дзяржаўным музеем народнай архітэктуры і побыту.
Лепшыя ўзоры глыбоцкай керамікі з фондаў музея-скансена прадстаўлены ў выставачных вітрынах. Займальную экскурсію па экспазіцыі правёў галоўны захавальнік фондаў музея народнай архітэктуры і побыту Аляксей Абрамчук.
Размова ішла пра асаблівасці рэгіянальнай керамікі, яе выраб, утылітарнае прызначэнне. Глыбочане даведаліся, што такое збан-спарыш, бабачнік, імбрычак, чым адрозніваецца гляк ад стаўбуна ці гладыша.
З прывітальным словам да прысутных звярнуліся дырэктары музеяў Сяргей Усік і Алена Мядзелец. Загадчыца Дома рамёстваў Таццяна Карнеева расказала пра сучасную кераміку, прадставіўшы на выставе гліняныя вырабы, вырабленыя мясцовымі майстрамі. Напрыканцы мерапрыемства ўсіх парадавалі музычным падарункам удзельнікі паэтычнай студыі “Сустрэчы для душы”.
Глыбачане і госці нашага города, скарыстайцеся магчымасцю пазнаць культуру свайго рэгіёна і ацаніць майстэрства ганчароў-рамеснікаў.
(5 лістапада 2026 года)








Стала ўжо добрай традыцыяй у дні школьных канікулаў праводзіць для вучняў школ горада і раёна розныя музейныя мерапрыемствы. На гэты раз мы наведаліся да вучняў малодшых класаў з пазнавальна-забаўляльнай гульнятэкай "Музейныя забавы". На мерапрыемстве, якое праводзіцца для дзяцей, якія наведваюць школьныя лагеры, супрацоўнікі нашага музея не толькі знаёмілі дзяцей з прадметамі даўніны, але і гулялі ў тэматычныя гульні. Дзеці з вялікай цікавасцю ўдзельнічалі ў гульнях, спаборнічаючы ў кемлівасці, спрыце і лагічным мысленні. Мы спадзяёмся, што гэтыя восеньскія канікулы запомняцца ім надоўга.
(4 лістапада 2026 года)


У кожнай эпохі - свае героі. Эпоха Савецкага Саюза ва ўяўленні сучаснага чалавека часта звязана з лёсавызначальнымі для народаў Еўропы падзеямі Вялікай Айчыннай вайны, падчас якой тысячы савецкіх грамадзян за самаадданую барацьбу з ворагам былі ўдастоены звання Героя Савецкага Саюза.
Гэта эпоха цікавая таксама і выдатнымі працоўнымі здзяйсненнямі савецкіх людзей, якія не шкадавалі сіл для пабудовы лепшай будучыні. Найвышэйшай узнагародай за поспехі ў працоўнай дзейнасці для жыхара Савецкай Беларусі было званне Героя Сацыялістычнай Працы, якім былі ўдастоены і працаўнікі Глыбоцкага раёна. Пра іх – нашых землякоў, якія сталі Героямі свайго часу – расказвае інфармацыйны ўрок “Зорны 1966 год”, падрыхтаваны музейнымі работнікамі. У 1966 годзе адразу чатыры жыхары нашага раёна атрымалі гэтае высокае званне.
27 кастрычніка навуковы супрацоўнік музея правёў інфармацыйны ўрок «Зорны 1966 год» для навучэнцаў Глыбоцкага дзяржаўнага каледжа, расказаўшы ім пра людзей, жыццё і працоўныя здзяйсненні якіх служаць выдатным прыкладам для цяперашняга маладога пакалення глыбачан.
(28 кастрычніка 2026 года)
15 кастрычніка ў Глыбоцкім гарадскім Доме культуры прайшло ўрачыстае мерапрыемства, прысвечанае Дню работнікаў культуры. У адной зале сабраліся тыя, хто закліканы дарыць людзям цудоўнае: спевакі і музыканты, танцоры, рамеснікі, бібліятэкары, мастакі, музейшчыкі.
Намеснік старшыні Глыбоцкага райвыканкама Таццяна Леанідаўна Тарасевіч і загадчык сектара культуры Таццяна Валер'еўна Мацюшонак павіншавалі культработнікаў са святам і ўручылі ім заслужаныя ўзнагароды.
Не засталася незаўважанай і дзейнасць нашага музея: навуковы супрацоўнік Ірына Круглая была ўзнагароджана Падзякай старшыні Глыбоцкага райвыканкама і Ганаровай граматай упраўлення культуры Віцебскага аблвыканкама, а навуковы супрацоўнік Уладзімір Мірончык - Граматай сектара культуры Глыбоцкага райвыканкама.
(15 кастрычніка 2026 года)




На мерапрыемства, якое прайшло 14 кастрычніка, былі запрошаны вучні адной са школ нашага горада. Сустрэча з мінулым адбылася ў часовай музейнай экспазіцыі, якая расказала дзецям аб важнай ролі маці-жанчыны ў традыцыйнай культуры беларусаў. А роля сапраўды была вялікая. Пачынаючы ад незамужніх дзяўчат да шаноўных бабуль - усе яны ўдзельнічалі ў народных святах і абрадах, спявалі песні, варажылі і выконвалі іншыя рытуальныя дзеянні.
Дзеці з цікавасцю правялі час - вывучалі музейныя прадметы, задавалі хвалюючыя пытанні і, нават, пазнаёміліся з тэкстамі беларускіх народных святочных песень, што стала выдатным завяршэннем мерапрыемства святочнага дня.
(14 кастрычніка 2026 года)
Работнікі сферы культуры ў мінулую нядзелю адзначылі сваё прафесійнае свята. Стала ўжо добрай традыцыяй да гэтага дня падводзіць вынікі працы і ўзнагароджваць пераможцаў.
12 кастрычніка ў абласной філармоніі сабраліся лепшыя работнікі культуры Віцебшчыны. Ва ўрачыстай абстаноўцы ім былі ўручаны заслужаныя ўзнагароды за поспехі і дасягненні ў працы. Сярод узнагароджаных і дырэктар нашага музея Алена Мядзелец. Алена Мікалаеўна ўзнагароджана Граматай Міністэрства культуры Рэспублікі Беларусь за добрасумленную плённую работу і значны ўклад у развіццё і папулярызацыю нацыянальнай культуры.
Агульнай узнагародай для ўсіх удзельнікаў сустрэчы стала выступленне Нацыянальнага акадэмічнага канцэртнага аркестра Беларусі імя Міхаіла Фінберга.
Яшчэ раз віншуем усіх калег з заслужанымі ўзнагародамі.
(12 кастрычніка 2026 года)

Сусветны дзень пошты штогод адзначаецца 9 кастрычніка ў гадавіну Сусветнага паштовага саюза, які быў створаны ў 1874 годзе. З таго часу Сусветны дзень пошты штогод адзначаюць у многіх краінах свету.
У гэты дзень супрацоўнікі нашага музея былі запрошаны ў Глыбоцкі сацыяльны пансіянат "Вішнёвы" на мерапрыемства, якое праводзілася для тых, хто пражывае ў пансіянаце. Размова ішла пра пошту. Удзельнікі мерапрыемства дзяліліся сваімі ўспамінамі, паслухалі расказ пра гісторыю станаўлення і развіцця паштовай сувязі, даведаліся шмат новага з гісторыі горада Глыбокае з дапамогай звычайных паштовак канца ХІХ - першай паловы ХХ стагоддзя.
Старадаўнія канверты і лісты, паштовая сургучная пячатка і паддужны званочак, паштовыя карткі і паштоўкі, а таксама лісты, адпраўленыя салдатамі з франтоў Вялікай Айчыннай вайны - удзельнікі мерапрыемства разглядалі гэтыя музейныя экспанаты ўважліва і з вялікай цікавасцю.
У канцы мерапрыемства кожны з прысутных у спецыяльна падрыхтаваныя паштовыя карткі напісаў свае пажаданні ўсім супрацоўнікам Глыбоцкага рэгіянальнага вузла паштовай сувязі Віцебскай філіялу РУП «Белпошта». Скончылася мерапрыемства музычнай кампазіцыяй, а праз некалькі хвілін працаўнікі пошты ў Глыбокім чыталі віншаванні ад тых, хто пражывае ў пансіянаце. Гэтыя віншаванні, напоўненыя душэўнай дабрынёй, паштары запомняць надоўга.
(9 кастрычніка 2026 года)

























Ва ўпраўленні культуры Віцебскага абласнога выканаўчага камітэта з'явіліся афіцыйныя старонкі ў