«Блудны д'ябал»
Кніга савецкага пісьменніка Лявонція Ракоўскага, якая была выдадзена ў 1931 годзе ў Ленінградзе друкарняй імя І. Фёдарава. Выданне багата ўпрыгожана гравюрамі беларуска-яўрэйскага графіка і мастака Саламона Юдовіна. На трэцяй старонцы маецца дароўны надпіс аўтара: “Моим дорогим глубокским землякам. Леонтий Раковский”. Лявонцій Іосіфавіч Ракоўскі нарадзіўся 28 снежня 1895 года ў мястэчку Глыбокае ў сям’і валаснога пісара. Падчас грамадзянскай вайны служыў у Чырвонай Арміі, пасля чаго, пераехаўшы ў Петраград, актыўна заняўся журналісцкай і літаратурнай дзейнасцю. Яго першыя творы, у тым ліку і аповесць “Блудны д’ябал”, былі прысвечаны паўсядзённаму жыццю беларускага мястэчка. Пазней атрымаў шырокую вядомасць, як аўтар гістарычных раманаў.