Фонды музея папоўніліся новым экспанатам
Прыемны падарунак атрымалі супрацоўнікі музея ад даўняга сябра - Блышко Паўла Фёдаравіча. Наш добры знаёмы прэзентаваў найцікавейшы прадмет, які, верагодна, у хуткім часе зойме месца ў экспазіцыі музея. Гаворка ідзе пра каштоўную паперу аднаго з металургічных таварыстваў пачатку ХХ стагоддзя, членам праўлення якога з'яўляўся Баляслаў Ялавецкі – персона, якая адыграла важную ролю ў гісторыі нашага горада.
Таленавіты інжынер, чыгуначнік і прадпрымальнік Баляслаў Антонавіч Ялавецкі стаў тым чалавекам, хто ініцыяваў у 1890-я гады будаўніцтва чыгункі, якая працягнулася ад станцыі Свянцяны Пецярбургска-Варшаўскай чыгункі праз Лынтупы і Паставы да нашага горада. 
Першы паравоз урачыста сустрэлі ў Глыбокім у 1897 годзе, азнаменаваўшы гэтым наступленне новай для нашага краю эпохі. І вырашальны ўклад у гэтую падзею ўнёс менавіта Баляслаў Ялавецкі.
Музей шчыра ўдзячны кожнаму неабыякаваму чалавеку, гатоваму перадаць музею значныя для гісторыі Глыбоцкай зямлі прадметы. Кожная падобная падзея - прыклад сумеснага захавання гістарычнай спадчыны.
(8 чэрвеня 2026 года)