Вялікай папулярнасцю ў глыбачан і гасцей нашага горада ў савецкія часы карысталіся народныя святы і гулянні. Асабліва маштабным і значным было свята провадаў зімы – Масленіца. Гэта адно з самых старажытных славянскіх свят. Пэўнай даты ў календары яно ніколі не мела: святкаваць пачыналі за восем тыдняў да Вялікадня. Велізарным плюсам гэтага свята было тое, што працягвалася яно цэлы тыдзень. Па адной з версій нашы продкі сталі адзначаць гэтае свята, каб ушанаваць бога Вялеса, які быў заступнікам хатняй жывёле. Паказальны і той факт, што царква практычна нічога не памяняла ў язычніцкім свяце. Старажытным абрадам проста надалі некаторыя рэлігійныя рысы.
Гэта было па-сапраўднаму народнае свята, на якое прыходзілі ўсе, як кажуць “ад мала да вяліка”. Як дзетвара, так і дарослыя, з вялікім задавальненнем коўзаліся з горкі, удзельнічалі ў снежных баях, каталіся на санях па вуліцах роднага горада. На свяце можна было не толькі паўдзельнічаць у конкурсах і віктарынах, але і атрымаць каштоўны прыз за перамогу. Не адно свята не абыходзілася без слупа з падарункамі - многія глыбачане дэманстравалі ў гэтым конкурсе свае спрыт і сілу. А колькі прысмакаў можна было пакаштаваць на гэтым свяце!
Вось што пісала наша газета пра масленіцу ў 1979 годзе: “Аб пачатку свята традыцыйных провадаў Зімы абвясцілі праімчаўшыеся па вуліцах горада ўпрыгожаныя тройкі, былінныя рускія волаты. Гарадскі стадыён ператварыўся ў казачны куток… Казачны Ямеля на сваёй запаветнай печы адкрывае новую старонку свята – масавае гулянне…”
Прайшлі гады, а свята провадаў зімы было і застаецца адным з самых папулярных у глыбачан.
Напярэдадні Дня памяці воінаў-інтэрнацыяналістаў, супрацоўнікі музея наведалі Корабаўскую сярэднюю школу ім. Р. І. Мацеюна. Мэтай візіту стала правядзенне ваенна-патрыятычнай гадзіны "Салдат вайны не выбірае", удзельнікамі якой выступілі вучні старэйшых класаў школы. Падчас мерапрыемства навучэнцы прагледзелі невялікі відэаролік, створаны музейшчыкамі па ўспамінах глыбачан, якія прымалі ўдзел у Афганскай вайне 1979 - 1989 гадоў. Крыху бліжэй з гісторыяй гэтага канфлікту юнакі і дзяўчаты пазнаёміліся дзякуючы прэзентацыі, падрыхтаванай музейнымі работнікамі.
Сімвалічна, што гэта сустрэча адбылася менавіта ў Карабах, бо мясцовая школа з 2012 года носіць імя Рамана Іосіфавіча Мацеюна - аднаго з пяці ўраджэнцаў нашага раёна, якія загінулі падчас той вайны. Правядзенне такіх урокаў ва ўстановах адукацыі з'яўляюцца данінай павагі ўсім беларусам, якія з гонарам выканалі ў гады ваеннай службы свой абавязак перад Айчынай.
(13 лютага 2026 года)
27 студзеня 2026 года наш музей падрыхтаваў тэматычнае мерапрыемства – інфармацыйную гадзіну “Набат памяці”, прысвечаную Дню памяці ахвяр Халакосту. Анлайн-сустрэча аб'яднала больш за 30 удзельнікаў з розных краін свету, нагадаўшы нам аб тым, што трагедыя Халакосту не павінна быць забытая.
Тэлемост звязаў Глыбокае з горадам Кір'ят-Бялік, размешчаным у Хайфскай акрузе Ізраіля і з'яўляецца горадам-пабрацімам беларускага райцэнтра. Яго адкрыў мэр Кір'ят-Бяліка Элі Дукорскі. Звяртаючыся да ўдзельнікаў, ён падкрэсліў важнасць захавання памяці аб мільёнах людзей, якія сталі ахвярамі нацысцкага генацыду і адзначыў, што асаблівую каштоўнасць сёння мае аб'яднанне намаганняў розных краін і пакаленняў дзеля захавання гістарычнай праўды. 
Паводле яго слоў, удзел у такіх праектах - знак таго, што ў свеце па-ранейшаму шмат неабыякавых людзей. З боку Глыбокага ў тэлемосце прынялі ўдзел прадстаўнікі грамадскіх аб'яднанняў і палітычных партый, члены БРСМ, а таксама выкладчыкі гісторыі ўстаноў адукацыі горада і раёна.
Цэнтральнай падзеяй тэлемоста стала выступленне вязніцы Люблінскага гета і канцэнтрацыйнага лагера Асвенцым Мір'ям Арэль. 
У звароце яна расказала пра трагічны лёс сваёй сям'і, пра жыццё ў гета, пра лагерныя выпрабаванні і пра тое, якім коштам удалося выжыць. Мір'ям Арэль заклікала моладзь памятаць урокі мінулага і не дапусціць паўтарэння такіх трагедый у будучыні. Для многіх удзельнікаў тэлемоста яе аповед стаў унікальнай магчымасцю пачуць праўду пра Халакост з першых вуснаў – ад чалавека, які прайшоў пекла нацысцкіх лагераў. Пасля завяршэння тэлемоста ўдзельнікі з Глыбокага абмеркавалі пытанні вывучэння Халакоста на тэрыторыі Глыбоцкага раёна і намецілі прыярытэтныя напрамкі далейшай даследчай і асветніцкай работы.
(27 студзеня 2026 года)
Гістарычную гадзіну «Сімвалы майго горада», прысвечаную 20-годдзю заснавання герба і сцяга горада Глыбокае, правялі супрацоўнікі музея, распавёўшы прысутным пра даволі працяглую гісторыю развіцця геральдыкі на Глыбоччыне. Гаворка ішла пра тое, як з'явіўся сучасны гарадскі герб і якую сімволіку ён нясе, а таксама пра цікавыя факты з гісторыі глыбоцкага сцяга. 
Сустрэчу ажывіла інтэрактыўная складаючая, падчас якой гасцям мерапрыемства было прапанавана здагадацца, якім населеным пунктам раёна мог бы адпавядаць загадзя створаны з дапамогай сучасных камп'ютарных тэхналогій герб.
Прыемна, што ўдзельнікамі сустрэчы сталі пераважна маладыя людзі, якім гэтае мерапрыемства дапамагло зірнуць на гісторыю роднага горада з новага боку.
(20 студзеня 2026 года)
27 снежня ў культурна-дэндралагічным комплексе в. Мосар адбылося ўрачыстае мерапрыемства, прысвечанае 100-годдзю з дня нараджэння Юозаса Булькі. На сустрэчу сабраліся не толькі мясцовыя жыхары, але і прыехалі шматлікія госці: святары, прадстаўнікі мясцовай улады, супрацоўнікі Глыбоцкага гісторыка-этнаграфічнага музея і культурна-дэндралагічнага комплексу вёскі Мосар і проста ўсе тыя, хто быў знаёмы з гэтым дзіўным чалавекам. Удзел у мерапрыемстве біскупа Віцебскай дыяцэзіі Алега Буткевіча падкрэсліў значнасць мосарскай святыні і вялізную ролю ў яе адраджэнні ксяндза-прэлата Булькі.
Падчас мерапрыемства адбылася прэзентацыя кнігі “Любіў Бога, прыроду і беларускі народ” пра жыццё і дзейнасць славутага святара, падарункавыя экзэмпляры якой аўтар выдання кс. Ян Крэміс уручыў ганаровым гасцям. Увазе прысутных была прапанавана выстава фатаздымкаў "На службе Богу і людзям", а таксама ўнікальныя відэаматэрыялы, знятыя пры жыцці Юозаса Булькі.
Вядучы мерапрыемствы Аляксандр Хайноўскі нагадаў асноўныя біяграфічныя звесткі знакамітага святара. Віцебскі біскуп Алег Буткевіч, старшыня Удзелаўскага сельскага выканаўчага камітэта Віктар Казіміравіч Карман, а таксама святары, якія прыехалі ў гэты дзень, падзяліліся ўспамінамі аб сваім настаўніку. Дарэчы, ксёндз Булка выхаваў 13 святароў. Усе выступоўцы сведчылі пра самаахвяраванне, працавітасць, любоў да кожнага чалавека, прыклад моцнай веры ў Бога, любоў да зямлі і прыроды, а таксама пра нястомную барацьбу святара з алкагалізмам.
Доктар Казімір Вацлававіч Яцына адзначыў, што не проста сябраваў з Булькам, але і ўсімі сіламі дапамагаў яму з самага пачатку служэння на глыбоцкай зямлі.
Першы экскурсавод культурна-дэндралагічнага комплексу в. Мосар Марына Раманаўна Ткачонак расказала аб дружнай і згуртаванай працы ўсіх прыхаджан па стварэнню будучага прыродна-ландшафтнага комплексу.
Экскурсавод Алена Паўлаўна Альшэўская шмат гадоў запар прывозіла ў Мосар турыстычныя групы не толькі з усёй Беларусі, і з далёкага і блізкага замежжа. Яна адзначыла, што Мосар прыцягваў турыстаў не толькі сваёй прыгажосцю і непаўторнасцю, але і магчымасцю паразмаўляць з неардынарным чалавекам, якім быў Юозас Булька.
Мінула вось ужо 15 гадоў, як побач з намі няма светлага, добрага чалавека. Але людзі па-ранейшаму едуць у гэтае знакамітае месца, і цяпер яны прыходзяць да магілы святара, каб ушанаваць яго памяць, падзякаваць яму за прыгажосць, якую ён стварыў з дапамогай прыхаджан, за вялізную шчодрасць яго сэрца. Добрыя справы Юозаса Булькі працягваюцца ў яго вучнях, сябрах, аднадумцах, а памяць пра яго заўсёды будзе жыць на Мосарскай зямлі.
(29 снежня 2025 года)
23 снежня ў Бягомльскім музеі народнай славы адбыліся V дзіцячыя партызанскія чытанні, прымеркаваныя да 80-годдзя Перамогі ў Вялікай Айчыннай вайне і вызваленні партызанамі гарадскога пасёлка Бягомль ад нямецка-фашысцкіх захопнікаў.
У ходзе чытанняў былі заслуханы выступленні навучэнцаў школ Докшыцкага, Глыбоцкага і Ушацкага раёнаў. У рэжыме анлайн да дзяцей з Беларусі далучыліся школьнікі Дзмітрыеўскага раёна Курскай вобласці Расійскай Федэрацыі.
Выступленні дзяцей, якія прагучалі на мерапрыемстве, закранулі тэмы партызанскага руху на тэрыторыі Барысаўска-Бягомльскай і Полацка-Лепельскай партызанскіх зон, генацыду беларускага народа, вызвалення населеных пунктаў ад нямецка-фашысцкіх захопнікаў і іншыя аспекты, звязаныя з падзеямі Вялікай Айчыннай вайны.
У чытаннях прынялі ўдзел вучні сярэдняй школы №1 г. Глыбокае імя П.В.Сухога. Пятрага Уладзіслаў рассказаў прысутным пра ўклад доследнага канструктарскага бюро Сухога ў Перамогу (навуковы кіраўнік - настаўнік гісторыі і грамадазнаўства Рабіза Наталля Аляксандраўна). Рабкоўскі Аркадзь выступіў з рассказам пра карныя аперацыі, праведзеныя супраць мірнага насельніцтва Глыбоцкага раёна (навуковы кіраўнік – старшы навуковы супрацоўнік музея Хайноўскі Аляксандр Вітальвіч).
Па матэрыялах IV дзіцячых партызанскіх чытанняў быў падрыхтаваны зборнік артыкулаў "Партызанскі архіў", у якім апублікавана даследчая праца "Шарагі: вёска з лёсам Шунеўкі" навучэнца сярэдняй школы №1 г. Глыбокае імя П.В.Сухога Мядзельца Станіслава.
(23 снежня 2025 года)
Штогод у трэцюю нядзелю лістапада работнікі сельскай гаспадаркі і перапрацоўчай прамысловасці нашай краіны адзначаюць сваё прафесійнае свята, якое з'яўляецца важнай падзеяй для ўсіх, хто працуе ў гэтых сферах.
Урачыстае мерапрыемства, прысвечанае Дню работнікаў сельскай гаспадаркі і перапрацоўчай прамысловасці, прайшло ў гарадскім доме культуры, дзе для ўзнагароджання сабраліся тыя, хто ўнёс вялікі ўклад у гарантаванне харчовай бяспекі краіны, насычэнне ўнутранага рынку высакаякаснай прадукцыяй сельскай гаспадаркі і перапрацоўкі. У адной з залаў дома культуры праходзіла выстава-дэгустацыя прадукцыі вядучых сельскагаспадарчых і харчовых прадпрыемстваў раёна з прадстаўленнем навінак вытворчасці і прадукцыі, якая заслужыла любоў і давер спажыўцоў. Супрацоўнікамі нашай установы да дадзенага мерапрыемства была аформлена тэматычная выстава, якая расказвае пра тое, як вырошчвалі хлеб нашы дзяды і прадзеды, пра герояў-хлебаробаў Глыбоччыны.
Святкаванне Дня Кастрычніцкай рэвалюцыі - гэта своеасаблівая даніна павагі гістарычным падзеям, якія прывялі да здабыцця незалежнасці Беларусі. У многіх гарадах нашай краіны напярэдадні гэтай знамянальнай даты прайшлі ўрачыстыя мітынгі з ускладаннем кветак да помніка Леніну і, канешне ж, святочныя канцэрты. Не стаў выключэннем і наш горад, дзе 108-ю гадавіну Кастрычніцкай рэвалюцыі адзначылі з вялікім размахам.
Урачыстаму канцэрту ў гонар святочнай даты, які адбыўся ў гарадскім доме культуры, папярэднічала тэматычная выстава "7 лістапада - чырвоны дзень календара". Створаная музейшчыкамі выстава перанесла наведвальнікаў у часы, калі падрыхтоўка і святкаванне Дня Кастрычніцкай рэвалюцыі з'яўлялася найважнейшай падзеяй у жыцці кожнага савецкага грамадзяніна. Экспанаты выставы камусьці нагадалі, а камусьці і расказалі не толькі пра грамадска-палітычнае, эканамічнае і культурнае жыццё краіны, але і пра паўсядзённы побыт яго жыхароў. Гэты невялікі музейны куток нагадаў аб даўно прайшоўшай эпосе, якую многія і сёння ўспамінаюць з настальгіяй.
(7 лістапада 2025 года)
Мерапрыемства, прысвечанае святкаванню Кастрычніцкай рэвалюцыі, прайшло ў выставачнай зале нашага музея. Удзел у гутарцы-абмеркаванні "Гэты дзень у гісторыі краіны" прынялі прадстаўнікі палітычных партый і грамадскіх арганізацый Глыбоцкага раёна, члены працоўных калектываў нашага горада, навучэнцы ўстаноў адукацыі. І, няхай, многія з удзельнікаў дадзенага мерапрыемства знаёмыя з гістарычным мінулым некалі вялікай краіны пад назвай СССР не па чутках, усё ж такі яны з непадробнай цікавасцю слухалі расказ навуковага супрацоўніка музея, разбаўляючы яго сваімі асабістымі ўспамінамі, абмяркоўвалі падзеі далёкага 1917 года і іх уплывам на фарміраванне сучаснага беларускага грамадства і дзяржавы. Дадзенае мерапрыемства, праведзенае музейшчыкамі напярэдадні гістарычнай даты, яшчэ раз нагадала глыбачанам аб неабходнасці захавання праўдзівых гістарычных звестак без якіх-небудзь фальсіфікацый, якія могуць прывесці да скажонага разумення сучаснасці і будучыні нашай дзяржавы.
(6 лістапада 2025 года)
Дзень Кастрычніцкай рэвалюцыі адсвяткавалі ў Глыбокім. Кіраўніцтва раёна, члены раённага каардынацыйнага савета, прадстаўнікі грамадскіх арганізацый і палітычных партый, моладзевы актыў і проста жадаючыя ўсклалі кветкі да помніка Леніна, што знаходзіцца ў двары Глыбоцкай раённай гімназіі.
Перад прысутнымі выступіла дырэктар музея Алена Мікалаеўна Мядзелец, якая расказала аб гэтым выдатным грамадскім і палітычным дзеячы, з імем якога, у першую чаргу, асацыіруецца дадзеная дата ў календары нашай дзяржавы.
(6 лістапада 2025 года)
