Новы выставачны праект музея прысвечаны гісторыі грашовага абарачэння на тэрыторыі нашай краіны. У экспазіцыі прадстаўлены толькі арыгінальныя манеты і банкноты, якія хадзілі на нашых землях на працягу дзвюх тысяч гадоў, з антычных часоў і да сучаснасці. Грошы - гэта люстэрка дзяржавы і таго, што ў ім адбываецца. Таму праз манеты і банкноты мы жадаем паказаць нашу гісторыю і той складаны шлях, які прайшоў наш народ у дасягнення ўласнай незалежнасці.
Гісторыя беларускага народа цесна ўзаемазвязана з лёсамі іншых народаў: літоўцаў, палякаў, татараў, яўрэяў, украінцаў, рускіх, латышоў і г.д. У розныя часы беларускія землі былі часткай Старажытнай Русі, Вялікага княства Літоўскага, Рэчы Паспалітай, Расійскай імперыі, Савецкага Саюза. І толькі ў канцы XX стагоддзі здабылі ўласную незалежнасць. Праз нашу зямлю прайшлі шматлікія войны і заваёўнікі, яе трывожылі рэвалюцыі і паўстанні, эпідэміі і хваробы. Усе гэтыя падзеі можна прасачыць праз гісторыю грашовага абарачэння.
Не згубіце магчымасць убачыць старадаўнія (і не вельмі) грашовыя знакі. Наведайце новую выставу, якая будзе працаваць да 8 лютага 2026 года.
108 гадоў таму адбылася Вялікая Кастрычніцкая сацыялістычная рэвалюцыя — адна з ключавых падзей XX стагоддзя.
Дзень Вялікай Кастрычніцкай Сацыялістычнай рэвалюцыі 7 лістапада адзначаўся ў СССР аж да 1991 года і лічыўся адным з самых галоўных святаў. У гэты дзень у 1917 годзе ў Петраградзе адбылося паўстанне пралетарыяту. Узброенымі матросамі, салдатамі і рабочымі была захоплена пошта, тэлеграф, тэлефон, а таксама Зімовы палац. Часовы ўрад быў звергнуты і аб'яўлена Улада Саветаў, якая праіснавала ў краіне каля сямідзесяці гадоў. Наступныя гады дзень 7 лістапада з'яўляўся дзяржаўным святам, «чырвоным днём календара», які адзначаўся масавымі дэманстрацыямі і ваенным парадам на галоўнай плошчы Масквы.
Для савецкіх людзей гэтае свята з'яўлялася яшчэ і падставай для сямейных і сяброўскіх зносін. Паштоўкі былі традыцыйнай формай віншаванняў у тыя часы. Гэта былі неад'емныя элементы перадсвяточнай атмасферы, своеасаблівыя «наладчыкі» на свята. Савецкую паштоўку, прысвечаную рэвалюцыі падпісвалі сябры, сваякі або блізкія людзі і адпраўлялі па пошце. Іх акуратна збіралі, беражліва захоўвалі многія пакаленні. Пасля таго, як Савецкі Саюз распаўся, а камуністычная партыя перастала з'яўляцца уладай, свята было адменена ў многіх рэспубліках былога Савецкага Саюза. Ва ўсякім выпадку, савецкая эпоха незваротна адышла ў мінулае. Сярод шматлікіх прадметаў таго часу нам засталіся ў спадчыну і паштоўкі, якія вельмі дакладна перадаюць атмасферу савецкіх святаў.
Паштоўкі і плакаты СССР дапамогуць нам захаваць гэтыя часы ў памяці. Рускія мастакі-ілюстратары добра пастараліся і стварылі па-сапраўднаму прыгожыя творы, на якія прыемна любавацца, што б яны сабой не сімвалізавалі.
З 13 кастрычніка па 2 лістапада 2025 года ў музеі прайшла выстава-дэкарацыя "Матулін куфэрак", прысвечаная Дню маці. Кожны прадмет дадзенай выставы — маленькая гісторыя пра цеплыню мацярынскай любові і ўтульнасць роднага дому. На працягу ўсяго жыцця ў кожнага чалавека самыя цёплыя пачуцці, светлыя і незабыўныя ўспаміны асацыіруюцца з вобразам мамы. Яна дае першыя ўрокі маральнасці, духоўнасці, дабрыні і цярпімасці.
Экспанаты выставы - гэта звычайныя бытавыя рэчы, якія да нядаўняга часу выкарыстоўваліся ў паўсядзённым жыцці глыбачан. Наведвальнікі змаглі ўбачыць ручнікі з вышытымі птушкамі, дываны з кветкавымі ўзорамі, самаробнае адзенне і іншыя цікавыя прадметы. Амаль усе яны - ручной работы, што падкрэслівае ролю жанчыны як стваральніцы ўтылітарных, але, пры гэтым, і прыгожых рэчаў. У кожнага, хто завітаў на выставу, “Матулін куфэрак” выклікаў шчырыя эмоцыі, напоўніў сэрцы ўспамінамі і адчуваннем матчынай пяшчоты.
Пасольства Японіі ў Рэспубліцы Беларусь сумесна з Глыбоцкім раённым выканаўчым камітэтам падрыхтавала жыхарам і гасцям нашага горада падарунак - выставу "Традыцыі і культура Японіі", якая знаёміць з рознымі аспектамі традыцыйнай японскай культуры.
Выстаўка прадстаўлена экспанатамі, якія былі выраблены ў Японіі і наглядна дэманструюць светапогляд і лад жыцця японцаў: макеты архітэктурных помнікаў, узоры страў японскай кухні, японскія лялькі, кімано, макеты традыцыйнага хатняга начыння і многае іншае.
18 ліпеня, у першы дзень Вішнёвага фестывалю адбылося ўрачыстае адкрыццё выставы, дзе супрацоўнікі музея расказалі аб культуры і традыцыях Японіі. Мерапрыемства прыцягнула мноства наведвальнікаў, якія пажадалі дакрануцца да загадкавага свету Краіны ўзыходзячага сонца.
Завяршылася адкрыццё выставы майстар-класам па каліграфіі і арыгамі. Наведвальнікі з цікавасцю вывучалі складаныя іерогліфы і спрабавалі стварыць папяровага жураўліка.
Выстава будзе працаваць да 14 верасня. Не прапусціце магчымасць пазнаёміцца з гэтым займальным праектам.
На выставу старажытных самавараў і прадметаў чаявання мы запрашаем жыхароў і гасцей нашага горада. Наведаўшы выставу ў гэтыя па-зімоваму марозныя дні, Вы не толькі ўбачыце яго вялікасць - САМАВАР, але і пазнаёміцеся з тымі прадметамі побыту нашых продкаў, якія суправаджалі чайную цырымонію. Гэта і разнастайныя чайныя сервізы, і прывабныя чайныя прыналежнасці, і прасцейшыя прыстасаванні для прыгатавання сагравальных напояў мінулых гадоў.
А галоўнае, наведаўшы гэтую выставу вы пазнаеце асаблівасці культуры чаявання розных пластоў грамадства мінулых стагоддзяў. Прычым, даведаецеся не толькі аб айчынных традыцыях, але і аб традыцыях чаявання ў арабскім свеце, у Японіі і нават у старажытным Егіпце.
Спадзяёмся, што пасля знаёмства з нашай выставай, вы захаваеце, а можа нават прымножыце, традыцыі чаявання і будзеце з велізарнай асалодай бавіць доўгія зімовыя вечары за кубачкам духмянага чаю.
Паштоўка-віншаванне з Днём Савецкай арміі і Ваенна-марскога флота стала ў СССР традыцыйным знакам увагі для вайскоўцаў толькі ў другой палове XX стагоддзя. Паштоўкі-віншаванні з 23 лютага не былі такія папулярныя, як, напрыклад, паштоўкі "З Новым годам!" або "З 8 сакавіка!", таму што ў тыя часы не было звычаю віншаваць усіх мужчын. Свята мела больш афіцыйны характар, і ў гэты дзень віншавалі менавіта прафесійных вайскоўцаў.
Пазней сталі віншаваць і тых, хто прайшоў службу ў арміі, а ў 1980-я гады – віншавалі ўжо ўсіх мужчын як сапраўдных ці патэнцыяльных абаронцаў. І ніхто не сумняваўся ў тым, што ў выпадку чаго мужчыны ўстануць на абарону Радзімы, сваіх сясцёр, жонак і матуль. На паштоўках таго часу абавязкова адлюстроўваліся суровыя воіны і маракі, сцягі СССР і рэспублік, зоркі, а галоўнае, выявы самых перадавых узбраенняў, якімі была ўзброена савецкая армія.
Апрача традыцыйна прынятых выяў, у СССР вялікую папулярнасць набылі віншавальныя паштоўкі з дзіцячым сюжэтам. Напрыклад, знакаміты сваімі навагоднімі паштоўкамі мастак Уладзімір Зарубін аформіў паштоўку да 23 лютага, на якой намаляваў хлопчыка, які надзеў вялікую яму бесказырку і стаіць на фоне партрэта матроса-рэвалюцыянера – дзеда ці прадзеда. Такім чынам падкрэслівалася пераемнасць пакаленняў у справе абароны Радзімы. Трэба прызнаць, што падобных паштовак у СССР было выпушчана значна менш, чым з традыцыйным сюжэтам. Але яны былі, і, па шчаслівым збегу акалічнасцяў, некалькі такіх асобнікаў захоўваюцца ў фондах нашага музея.
Прапануем і вам пазнаёміцца з імі.
Без солнца нет счастья, без женщины нет любви,
без матери нет ни поэта, ни героя.
Вся гордость мира – от матерей.
Максим Горький
Для жанчыны няма больш значнай і незабыўнай падзеі ў жыцці, чым нараджэнне дзіцяці. Быць маці - гэта ні з чым непараўнальнае шчасце! Быць маці - значыць даць жыццё новаму чалавеку, ахоўваць і аберагаць дзіцяці, навучыць яго жыць у гэтым свеце і дапамагчы стаць паўнавартасным членам грамадства. Падкрэсліваючы глыбокае паважлівае стаўленне да жанчыны-маці, у большасці краін свету заснавана свята - Дзень маці. На дзяржаўным узроўні ў многіх краінах свята адзначаецца ў розныя поры года. У нашай краіне Дзень маці адзначаюць штогод 14 кастрычніка.
Гісторыя свята сыходзіць каранямі ў рэлігійнае свята - Пакроў Прасвятой Багародзіцы, ва ўсіх праваслаўных цэрквах у гэты дзень праводзіцца святочнае богаслужэнне. Лічыцца, што ў 910 годзе ў Ерусаліме цудоўным чынам Багародзіца явіла сябе, падчас набажэнства многія людзі ўбачылі ў небе Маці Божую, якая пакрывала ўсіх людзей, якія маліліся шырокім белым покрывам, імкнучыся абараніць усіх дзяцей Божых. Менавіта таму Дзень маці ў Беларусі прымеркаваны да такога важнага ў праваслаўнай рэлігійнай традыцыі свята.
Фатаграфія з самых першых дзён свайго існавання стала прадметам захаплення чалавецтва, і застаецца такім да гэтага часу. Выгляд рэальнага свету, застылага ў вечнасці, не мог не выклікаць адпаведных эмоцый - бо ўжо сам па сабе фотаздымак падобны да маленькага цуду.
Гэтаму "цуду", роўна як і мастацтву фатаграфіі ў цэлым, прысвечана новая выстава. Наведаўшы яе, вы зможаце прасачыць за ходам развіцця і ўдасканалення фотасправы, спазнаць гэты складаны працэс стварэння здымка ці проста атрымаеце асалоду ад знаёмства са старым фотаздымкам. Паспяшайце. Выстава будзе працаваць толькі да канца жніўня.
Выстава “І клічуць, і гучаць, і звіняць”, якая зараз праходзіць у нашым музеі, знаёміць наведвальніка са старажытнымі музычнымі інструментамі. На ёй прадстаўлены ўнікальныя ўзоры музычных інструментаў, якія выкарыстоўваліся глыбачанамі ў розныя гістарычныя перыяды, а значыць сталі неад’емнай часткай музычнай культуры нашага рэгіёна. Выстаўка працуе з 3 па 28 красавіка 2024 года ў выставачнай зале нашага музея. Запрашаем Вас у захапляльны свет музыкі.
