Да 60-годдзя палёту Гагарына ў космас
Юрый Гагарын - савецкі лётчык, біяграфію якога кожны ведае яшчэ са школы. Гагарын - чалавек, які здзейсніў першы палёт у космас. Лётчык-касманаўт стаў узорам і легендай не толькі для жыхароў СССР, ён з'яўляецца ганаровым грамадзянінам многіх гарадоў свету. Юрый Аляксеевіч адкрыў новую старонку ў даследаванні космасу і стаў сімвалам развіцця савецкай навукі і авіяцыі.
У памяць аб гэтым чалавеку і яго подзвігу ў імя касмічнай навукі горад Гжатск у Смаленскай вобласці быў перайменаваны ў горад Гагарын. Міжнароднай авіяцыйнай федэрацыяй у 1968 годзе быў заснаваны медаль імя Ю. А. Гагарына. Імя Гагарына носіць Ваенна-паветраная акадэмія і Навукова-даследчы выпрабавальны цэнтр падрыхтоўкі касманаўтаў. Імя першага касманаўта носіць "Камсамольскі-на-Амуры авіяцыйны завод імя Ю. А. Гагарына", які з'яўляецца філіялам Авіяцыйнай холдынгавай кампаніі "Сухі". І разам з тым, адна з цэнтральных вуліц горада Глыбокае, практычна адразу ж пасля знамянальнай падзеі, была перайменавана ў вуліцу Гагарына.
У рашэнні Глыбоцкага гарвыканкама ад 20.04.1961 №37 пазначана: «Разгледзеўшы хадайніцтва Глыбоцкага райпрамкамбіната і калектыву работнікаў УНР-65 у адзначэнне вялікага подзвігу героя-лётчыка, касманаўта Юрыя Гагарына, выканкам гарадскога Савета дэпутатаў працоўных вырашае: перайменаваць вуліцу Беластоцкую ў вуліцу Юрыя Гагарына».
Затым у нашым горадзе з'яўляецца вуліца Мікалаева (названая ў гонар 3-га савецкага касманаўта Андрыяна Рыгоравіча Мікалаева) і вуліца Касманаўтаў.
З гэтай знамянальнай падзеі атрыбуты космасу пачалі пранікаць нават у побыт простых савецкіх людзей. Іх можна было сустрэць на кожным кроку. Грамадзяне краіны Саветаў прачыналіся пад звон будзільніка «Усход», выпушчанага ў гонар палёту Гагарына на аднайменным касмічным апараце. Снедалі і пілі чай, выкарыстоўваючы падшклянкі з выявай зорак, камет і спадарожнікаў. Пыласос «Ракета», ёлачныя цацкі ў выглядзе касманаўтаў і халадзільнікі абцякальнай формы - увесь побыт быў звязаны з космасам і касмічнымі вобразамі. У кожнага другога савецкага чалавека была сабрана вялікая калекцыя марак на касмічную тэму.
Ды і сам піянер космасу ўсміхаўся са шматлікіх плакатаў, паштовых марак і сувенірных паштовак. Усе хлапчукі і дзяўчынкі марылі быць касманаўтамі, ва ўсіх быў гонар, што космас пакораны менавіта сваім, блізкім і практычна родным чалавекам - Юрыем Гагарына.
У нашым музеі захоўваюцца такія прадметы, з якімі мы і прапануем вам пазнаёміцца:
