Дню абаронцаў Айчыны прысвячаецца...
Дзень абаронцаў Айчыны і Узброеных Сіл Рэспублікі Беларусь - адзін з самых слаўных дзён у нашым календары. Гэта свята воінскай доблесці і гонару, свята сапраўдных мужчын, на сілу, вернасць і мужнасць якіх наша краіна спадзяецца ў любую эпоху.
У СССР гэта свята адзначалася як Дзень Савецкай Арміі і Ваенна-марскога флоту. Маладая савецкая дзяржава мела патрэбу ў моцнай арміі і ў 1918 годзе былі падпісаныя дэкрэты аб стварэнні Рабоча-сялянскай Чырвонай Арміі (28 студзеня) і Рабоча-сялянскага Чырвонага флоту (11 лютага). Афіцыйным днём нараджэння Чырвонай Арміі лічыцца 23 лютага 1918 года, калі атрады чырвонагвардзейцаў атрымалі першую перамогу над кайзераўскімі войскамі пад Псковам і Нарвай у ходзе Першай сусветнай вайны. Праўда, на некалькі гадоў пра гэты дзень забыліся. І толькі праз чатыры гады, 27 студзеня 1922 года Прэзідыум УЦВК РСФСР апублікаваў пастанову аб чацвёртай гадавіне Чырвонай Арміі, у якой гаварылася: «У адпаведнасці з пастановай IX Усерасійскага з'езда Саветаў аб Чырвонай Арміі Прэзідыум УЦВК звяртае ўвагу выканкамаў на надыходзячую гадавіну стварэння Чырвонай Арміі». У 1923 годзе, у год пяцігадовага юбілею Чырвонай Арміі, адбылося шырокае святкаванне і з гэтага часу дату сталі адзначаць масава па ўсёй краіне. Першапачаткова свята называлася Дзень Чырвонай Арміі і Флоту. Але ўжо з 1946 года змянілася назва на “Дзень Савецкай Арміі і Ваенна-марскога флоту”. У нашай краіне дзень 23 лютага атрымаў афіцыйны статус дзяржаўнага свята толькі ў сакавіку 1998 года. З гэтага моманту ён становіцца «мужчынскім» днём у календары нараўне з жаночым святам 8 сакавіка.
Ва ўсе часы ў дадзенае свята ўносіліся розныя карэктывы, але як бы яно не называлася, менавіта ў гэты дзень у бок мужчын гучаць самыя цёплыя пажаданні і дорацца падарункі. Адным з самых даступных і папулярных падарункаў ва ўсе часы была паштовая картка (паштоўка).
Савецкая віншавальная паштоўка - гэта заўсёды маленькі плакат, асабліва, калі яна звязаная з дзяржаўнымі святамі. Сюжэт вельмі просты і пры гэтым напоўнены сімваламі і знакамі. Да прыкладу, паштоўкі, прысвечаныя 23 лютага, - гэта заўсёды зорка, гэта сцягі родаў войскаў, віды ваеннай тэхнікі...
Да 1950-х гадоў тэматычныя паштоўкі выдаваліся рэдка. Сур'ёзнымі накладамі савецкая паштоўка стала выходзіць з 1953-54 гадоў. Да гэтага часу былі адноўлены паліграфічныя прадпрыемствы і з'явілася магчымасць выпускаць паштоўкі вялікімі накладамі. У 1968 годзе, да 50-годдзя Савецкай Арміі, мільёны святочных паштовак разляцеліся па ўсёй краіне. З сярэдзіны 1950-х і да канца 1980-х гадоў штогод да 23 лютага выходзіла па 10-15 відаў паштовак. Выбар быў велізарны, але у кожнай савецкай паштоўцы адчувалася моц і непераможнасць Савецкай Арміі.
Сёння мы прапануем вам успомніць мінулае з дапамогай савецкай віншавальнай паштоўкі:
