Грамота
ЖАЛОВАННАЯ ДАННАЯ С ОТВОДОМ (РУБЕЖОМ) ЗАПОВЕДНАЯ ГРАМОТА ВЕЛИКОГО КНЯЗЯ ПОЛОЦКОГО АНДРЕЯ ОЛЬГЕРДОВИЧА ФЁДАРУ И ДМИТРИЮ ФЁДОРОВИЧУ КОРСАКАМ НА СЕЛО СЕМЕНЦОВО НА БЕРЕЗВЯЧИ (1350-1378, 1381-1387 гг.)
Се аз князь великий Андрей Ольгердович полоцкий дали есьмы Фёдору и сыну его Дмитрию село Семенцово на Березвячи.
А тому селу велели есьмо и рубеж зарубити от реки от Березвячи по реке по Прудышчины в верх к участым а от верховья от Прадышчнаго рубеж по мху в озерчо в Демьяное, а от демьяного дорогою к Заборью, а от Заборья дорогою к озерцом, а от озерец дорогою ку Залесью, а от Залесья в озеро у Городно, а из Городна в озеро у Мырично, а з Мырична в озеро Белое, а з белого озера рубеж у мох великий, а зо мху на Гривос, а от Гривеса у ручаи, а по ручью в озеро у Потов, а с Потова по Потовицы в реку в Дисну.
А через тот рубеж переступит, нашим людем ненадобне ходити никому ни з собакою, а ни з пешнею.
А хто тот рубеж переступит, даст князю великому три гривны золота.
А при том был князь Василий Друцкий, а Братоша, а Гирдени Любецки.
А того рубежа зарубати посылали есьмо ездоком Донярку.
У его прывилею печать привесистая одна.
Полоцкие грамоты XIII – XVI вв. М., 1977. с 43-44