Глыбоцкі ўнівермаг
У часопісе «Сельское хозяйство Белоруссии» за лістапад 1983 года быў надрукаваны артыкул першага дырэктара Глыбоцкага ўнівермага Міхалевіч «Упрыгожванне горада». У ёй дырэктар расказала чытачам аб нядаўна адкрыўшымся аб'екце гандлю і спецыфіцы працы маладога калектыву:
«У нашым райцэнтры, мабыць, ні адна новабудоўля не выклікала такога ўсеагульнага радаснага настрою, як універмаг. Яго адкрыцця з нецярпеннем чакалі жыхары ўсяго раёна. У красавіку гэтага года ён прыняў першых наведвальнікаў. Наш універмаг упрыгожыў горад, удала ўпісаўся ў яго цэнтральную частку. Мы атрымалі вялікія выгоды для працы, для больш поўнага задавальнення патрэб пакупнікоў.
Гандлёвая плошча ўнівермага 1980 квадратных метраў. Абсталяваны ён, як кажуць, па апошнім слове тэхнікі. Гандаль арганізаваны па спажывецкіх комплексах. На першым паверсе размешчаны тавары для мужчын. Другі прадстаўлены дзіцячаму аддзелу. Тут жа абсталяваны «Куток прыроды». На трэцім паверсе прадаюцца тавары для жанчын. Усё гэта дапамагае пакупнікам, не губляючы часу, набыць неабходныя рэчы, пачынаючы з гузікаў, нітак і канцтавараў і заканчваючы абуткам, адзеннем, тканінамі і іншымі вырабамі. Вялікую дапамогу ў гэтым ім аказваюць прыгожа аформленая рэклама і інфармацыя радыёвузла ўнівермага.
Для работнікаў створаны добрыя ўмовы: ёсць пакой адпачынку, канферэнцзала, бытоўкі, будзе адкрыта свая бібліятэка.
Для выгод пакупнікоў ва ўнівермагу ўведзены дадатковыя паслугі: стол раскрою, пакой дробнага рамонту, падгону адзення. Працуюць кафетэрый і камера захоўвання ручнога багажу».
Праўда, больш цікавая гісторыя, звязаная з будаўніцтвам новага ўнівермага, адбылася яшчэ на этапе закладкі падмурка. Толькі адлюстраваць гэтую падзею на старонках раённай газеты было ў той час немагчыма. Прайшло не адно дзесяцігоддзе, пакуль у раённай газеце з'явіўся артыкул Галіны Сутулы "З гісторыі кладаў на Глыбоччыне", у якой карэспандэнт дзеліцца з чытачамі незвычайным фактам, які адбыўся падчас будаўніцтва новага гандлёвага аб'екта:
“У пачатку 80-х гадоў ХХ стагоддзя ў цэнтры Глыбокага пачалася рэканструкцыя. Калі вялі падземныя камунікацыі да будынка новага ўнівермага, знайшлі клад… Клад знайшлі, але ў дзяржаву яго не здалі.
Прайшоў час. Чуткі аблягліся. Людзі супакоіліся. І зноў нечаканая навіна ўскалыхнула райцэнтр: на Каўказе пры спробе збыць скупшчыкам залатыя манеты быў затрыманы глыбоцкі ўчастковы. Кіламетры не дапамаглі схавацца ад правасуддзя: ён атрымаў турэмны тэрмін”.