Для вучняў пачатковых класаў сярэдняй школы №3 апошнія дні перад канікуламі запомніліся незвычайнымі заняткамі – іх праводзілі навуковыя супрацоўнікі музея. На музейным уроку «Продкі нашых рэчаў» дзеці пазнаёміліся з разнастайнымі старадаўнімі прадметамі. 100 – 150 гадоў назад нашы продкі выкарыстоўвалі зусім іншыя, у адрозненні ад сучасных, прадметы хатняга ўжытку і прылады працы. На сённяшні дзень большасць гэтых рэчаў забытая.
У ходзе ўрока вучням трэба было высветліць прызначэнне тых ці іншых старадаўніх прадметаў. Як сапраўдныя даследчыкі, дзеці падрабязна вывучалі кожны прапанаваны ім прадмет: вызначалі з якога матэрыялу ён зроблены, для чаго і як яго выкарыстоўвалі нашы продкі, спрабавалі даць правільную назву. Часам вучні прыводзілі вельмі цікавыя гіпотэзы. Занятак быў замацаваны вясёлай фізкультхвілінкай і разгадваннем загадак.
З дадзеным мерапрыемствам музейшчыкі спадзяюцца наведаць усе школы раёна, а таксама пабываць ва ўстановах дашкольнай адукацыі.
Для вучняў гарадскіх і сельскіх школ супрацоўнікамі музея падрыхтавана інтэрактыўная выстава-гульня «Гістарычны бой». У ходзе гульні дзеці знаёмяцца з цікавымі старонкамі гісторыі роднага горада і раёна, а таксама спазнаюць унікальныя прадметы з ужытку іх продкаў. Дух спаборніцтвы і наяўнасць прадметаў даўніны дазваляюць правесці гэтае мерапрыемства максімальна эфектыўна.
Класныя кіраўнікі, якія жадаюць правесці гэтую гульню ў сваім класе, могуць звярнуцца ў музей. Мерапрыемства арганізоўваецца і праводзіцца ў школах раёна па папярэднім запісе.
Занятак праводзіцца для навучэнцаў школ горада малодшай узроставай групы ў музейнай зале "Сялянская хата".
Падчас занятку вучні змогуць пазнаёміцца з традыцыйным укладам жыцця беларусаў, асновамі побыту і асаблівасцямі аздаблення сялянскага дома.
На занятках дэманструюцца музейныя экспанаты (калаўрот, прасы, кухоннае начынне, валок і качалка, куфар і яго змесціва), вучні змогуць стаць удзельнікамі тэматычных гульняў, конкурсаў, віктарын, падрыхтаваных музейнымі педагогамі.
Як жылі людзі раней.
Занятак праводзіцца для вучняў 2-4 класаў ў экспазіцыйнай зале музея.
Вучні змогуць aдаведацца аб жыцці старажытных людзей і іх асноўных занятках, аб першых прыладах працы.
З дапамогай музейных прадметаў і дадатковых матэрыялаў вучні паспрабуюць “здабыць агонь”, прасвідраваць адтуліну ў камяні, пабудаваць макет старажытнага жылля, зляпіць гліняны гаршчок і многае іншае.
Штогод 18 мая адзначаецца Міжнародны дзень музеяў. Для супрацоўнікаў музеяў гэты дзень з’яўляецца не толькі святам, але яшчэ і днём напружанай работы. Стала ўжо добрай традыцыяй ў гэты дзень адчыняць дзверы музеяў для ўсіх жадаючых і прадстаўляць новыя выставы і ўнікальныя музейныя экспанаты. З кожным годам набірае папулярнасць правядзенне “ночы музеяў”.