16 сакавіка супрацоўнікамі музея для вучняў Шунеўскай базавай школы была праведзена гістарычная гадзіна «Памятаць, каб жыць», прысвечаная Дню памяці ахвяр Хатынскай трагедыі. Размова вялася аб тых незлічоных ахвярах, што панёс наш край падчас гітлераўскай акупацыі. Гета ў Глыбокім, Плісе і Празароках, канцлагер у Беразвеччы, дзясяткі спаленых вёсак, сярод якіх "сястра Хатыні" - вёска Шарагі на тэрыторыі Глыбоцкага раёна. Гэтыя горкія старонкі нашай гісторыі не могуць быць аддадзены забыццю, бо за кожнай з іх - гібель мноства ні ў чым не вінаватых людзей, памяць аб якіх - святая.
У найбліжэйшыя дні правядзенне дадзенага мерапрыемства запланавана ў шэрагу іншых устаноў адукацыі раёна, што стане нашым укладам у захаванне гістарычнай памяці аб трагедыі беларускага народа ў гады Вялікай Айчыннай вайны.
(16 сакавіка 2026 года)
Напярэдадні Дня Канстытуцыі Рэспублікі Беларусь супрацоўнікі музея правялі інфармацыйны дыялог “Канстытуцыя. Гісторыя. Сучаснасць». Яго ўдзельнікамі сталі старшакласнікі ДУА "Сярэдняя школа №2 г. Глыбокае імя П. М. Свірко", у адным з класаў якой і адбылося гэтае мерапрыемства.
У ходзе сустрэчы былі закрануты пытанні, звязаныя з гісторыяй развіцця канстытуцыйнай думкі на беларускіх землях, паслядоўна разгледжаны этапы станаўлення асноўнага закона нашай дзяржавы. А замацаваць новы матэрыял дапамагла тэматычная мультымедыйная гульня, якая прыўнесла ў зносіны пэўны спаборніцкі характар.
(13 сакавіка 2026 года)
У гарадскім доме культуры прайшла выніковая нарада работнікаў сектара культуры, дзе прысутнічалі спецыялісты з усіх устаноў сферы раёна. На нарадзе былі агучаны вынікі працы за 2025 год і агавораны планы на бягучы.
Прыемнай і ганаровай часткай мерапрыемства стала ўручэнне заслужаных узнагарод найлепшым установам культуры і іх работнікам. Глыбоцкі музей быў удастоены ганаровай граматы Упраўлення культуры Віцебскага абласнога выканаўчага камітэта за значны ўклад у развіццё, захаванне і папулярызацыю гісторыка-культурнай спадчыны рэгіёна. Граматамі сектара культуры Глыбоцкага раённага выканаўчага камітэта былі адзначаны і нашы супрацоўнікі - Дзмітрый Абрамчык і Таццяна Шкадун.
(10 сакавіка 2026 года)
У Міжнародны жаночы дзень наш музей стаў удзельнікам рэспубліканскай акцыі "Прыгожае ў прыгожым", якая прадставіла цудоўнай палове чалавецтва права на льготнае наведванне музейнай экспазіцыі і дзеючых выстаў.
Аднымі з тых, хто скарыстаўся прадстаўленай магчымасцю, сталі супрацоўніцы падатковай службы раёна, якія наведалі выставу "Віцебская акварэль". Было прыкметна, што творы выдатных айчынных акварэлістаў пакінулі незгладжальны водгук у сэрцах нашых наведвальніц і дапамаглі зрабіць цудоўны жаночы дзень яшчэ прыгажэйшым.
(9 сакавіка 2026 года)
З матэрыяламі выставы “У баях за Айчыну”, прысвечанай дзейнасці спецыяльных фарміраванняў НКУС на акупіраванай тэрыторыі Беларусі ў гады Вялікай Айчыннай вайны, пазнаёміліся вучні старэйшых класаў гарадскіх і сельскіх школ раёна. Спецыяльна для іх супрацоўнікі музея падрыхтавалі і правялі ўрокі мужнасці.
У якасці нагляднасці на музейным уроку былі задзейнічаны тэматычныя банеры Беларускага дзяржаўнага музея гісторыі Вялікай Айчыннай вайны з рэдкімі фотаздымкамі, дакументамі, улёткамі, старонкамі газет і рукапісных партызанскіх часопісаў. На ўроку дзеці пачулі цікавае апавяданне аб малавядомых фактах баявых дзеянняў аператыўных груп НКУС і НКДБ на тэрыторыі БССР. У іх ліку - спецгрупа "Паўночныя", якая дзейнічала ў гады акупацыі на тэрыторыі Глыбоцкага раёна.
(6 сакавіка 2026 года)
23 лютага 2026 года ў гарадскім Доме культуры адбылося ўрачыстае мерапрыемства, прысвечанае Дню абаронцы Айчыны і Узброеных Сіл Рэспублікі Беларусь. Спецыяльна для гасцей свята супрацоўнікі музея падрыхтавалі экспазіцыю, якая расказвае пра адну са слаўных старонак нашай гісторыі – дзейнасць войскаў Народнага камісарыята ўнутраных спраў на тэрыторыі Беларусі ў гады Вялікай Айчыннай вайны. Архіўныя дакументы, фатаграфіі, пажоўклыя старонкі друкаваных выданняў расказалі аб ролі войскаў НКУС у арганізацыі партызанскага руху, барацьбе з варожымі дыверсантамі, распрацоўцы і правядзенні аперацый па ліквідацыі варожых агентаў на часова акупаванай тэрыторыі БССР. Непадробную цікавасць у наведвальнікаў мерапрыемства выклікала сапраўдная савецкая ваенная форма ўнутраных войскаў СССР, а таксама ўзнагароды і нагрудныя знакі, якія беражліва захоўваюцца ў фондах нашага музея.
(24 лютага 2026 года)
Знаёмства з Саборам Нараджэння Прасвятой Багародзіцы для ўсіх жадаючых арганізавалі супрацоўнікі музея ў Сусветны дзень экскурсавода. Перад уваходам у храм сабраліся неабыякавыя да гісторыі нашага краю людзі, сярод якіх аказаліся не толькі мясцовыя жыхары, але і госці нашага горада. Правёў экскурсію навуковы супрацоўнік музея, распавёўшы гасцям шмат новага і цікавага пра гісторыю найстарэйшай пабудовы горада, і, у першую чаргу, яе самай таямнічай часткі - падзямелля.
(22 лютага 2026 года)
На Цэнтральнай плошчы горада прайшлі раённыя масленічныя гулянні з разнастайнымі вясёлымі забавамі, тэматычнымі падворкамі, займальнымі конкурсамі і задорнымі спаборніцтвамі.
Наш музей таксама прыняў удзел у святочных мерапрыемствах, у тым ліку і ў конкурсе-выставе на лепшы дэкаратыўны выраб «Масленічныя сані з цудамі». Нашы сані сталі бясспрэчным пераможцам у намінацыі "Самыя прыгожыя санкі".
Дзякуем усім гасцям свята, якія за нас прагаласавалі!
(22 лютага 2026 года)
Вялікай папулярнасцю ў глыбачан і гасцей нашага горада ў савецкія часы карысталіся народныя святы і гулянні. Асабліва маштабным і значным было свята провадаў зімы – Масленіца. Гэта адно з самых старажытных славянскіх свят. Пэўнай даты ў календары яно ніколі не мела: святкаваць пачыналі за восем тыдняў да Вялікадня. Велізарным плюсам гэтага свята было тое, што працягвалася яно цэлы тыдзень. Па адной з версій нашы продкі сталі адзначаць гэтае свята, каб ушанаваць бога Вялеса, які быў заступнікам хатняй жывёле. Паказальны і той факт, што царква практычна нічога не памяняла ў язычніцкім свяце. Старажытным абрадам проста надалі некаторыя рэлігійныя рысы.
Гэта было па-сапраўднаму народнае свята, на якое прыходзілі ўсе, як кажуць “ад мала да вяліка”. Як дзетвара, так і дарослыя, з вялікім задавальненнем коўзаліся з горкі, удзельнічалі ў снежных баях, каталіся на санях па вуліцах роднага горада. На свяце можна было не толькі паўдзельнічаць у конкурсах і віктарынах, але і атрымаць каштоўны прыз за перамогу. Не адно свята не абыходзілася без слупа з падарункамі - многія глыбачане дэманстравалі ў гэтым конкурсе свае спрыт і сілу. А колькі прысмакаў можна было пакаштаваць на гэтым свяце!
Вось што пісала наша газета пра масленіцу ў 1979 годзе: “Аб пачатку свята традыцыйных провадаў Зімы абвясцілі праімчаўшыеся па вуліцах горада ўпрыгожаныя тройкі, былінныя рускія волаты. Гарадскі стадыён ператварыўся ў казачны куток… Казачны Ямеля на сваёй запаветнай печы адкрывае новую старонку свята – масавае гулянне…”
Прайшлі гады, а свята провадаў зімы было і застаецца адным з самых папулярных у глыбачан.
17 лютага 2026 года ў выставачнай зале музея адбылося адкрыццё выставы «Віцебская акварэль», якая знаёміць з творчасцю майстроў аднайменнага грамадскага аб'яднання, якое ўключае лепшых акварэлістаў нашай краіны.
На належны лад усіх удзельнікаў сустрэчы настроіў музычны эцюд у выкананні выкладчыка Глыбоцкай дзіцячай школы мастацтваў Святланы Шуран, за якім адбылася грунтоўная размова, як пра акварэль у цэлым, так і пра творчасць віцебскіх мастакоў, якія праславілі гэты від выяўленчага мастацтва, у прыватнасці. Даніну павагі аддалі прысутныя ў зале такім знакавым майстрам акварэлі, як Іван Сталяроў, Фелікс Гумен, Міхась Ляўковіч і многім іншым.
Цікавым момантам адкрыцця выставы стаў майстар-клас па акварэлі ад Юрыя Каўбасіча, настаўніка Глыбоцкай дзіцячай мастацкай школы імя Язэпа Драздовіча. Дзякуючы яго выкладчыцкаму таленту гэтая самабытная мастацкая тэхніка стала больш зразумелай першым наведвальнікам нашай новай выставы.
Запрашаем пазнаёміцца з ёю і Вас!
(18 лютага 2026 года)
