Напярэдадні Дня Незалежнасці Рэспублікі Беларусь і 82-й гадавіны вызвалення Беларусі ад гітлераўскіх захопнікаў наш музей прапануе ўвазе жыхароў і гасцей горада выставу "Трагедыя страт і Веліч Перамогі". На ёй прадстаўлены фотакопіі графічных работ на тэму Вялікай Айчыннай вайны са збору расійскага калекцыянера Уладзіміра Белікава, перададзеныя прадстаўніцтвам Россупрацоўніцтва ў Рэспубліцы Беларусь.
Выстава працуе ў музейнай зале па вуліцы Маскоўскай. Запрашаем усіх жадаючых пазнаёміцца з выдатнымі графічнымі работамі таленавітых майстроў.
27 чэрвеня ў культурна-дэндралагічным комплексе вёскі Мосар пройдзе тэатралізаваная канцэртна-забаўляльная праграма "Як улетку шукалі папараць-кветку". Запрашаем жыхароў і гасцей на свята.
Запрашаем вас акунуцца ў гэты вясёлы і захапляльны свет - сустрэцца з героямі, якія ажываюць прама перад вамі! Пападаючы ў царства велізарных мульцяшных лялек, кожны наведвальнік зможа прымерыць на сябе гарэзлівы вобраз.
Жадаеце праверыць сваю трапнасць - пагуляйце ў гольф, заганяючы шарыкі ў пашчу ваўка: гэта так займальна! Або пакідайце мячыкі з рагаткі-катапульты, замацаванай на рагах казла, а яшчэ лепш - бітай адпраўце іх у кошык (гэтакая імітацыя вядомай лапты). Жадаеце пахістацца на арэлях - усаджвайцеся на спіну мядзведзя і атрымлівайце задавальненне. А для самых маленькіх наведвальнікаў - падлогавая мазаіка "Маша і Мядзведзь".
Сустракайце вашых любімых герояў з класічных мультфільмаў, такіх як Папугай Кеша, героі "Ну, пачакай!" і многія іншыя. Ажывіце дзіцячыя ўспаміны і дзяліцеся імі са сваімі дзецьмі.
Словам, занятак знойдзецца кожнаму, бо інтэрактыўнае мерапрыемства разлічана як на індывідуальнага, так і на сямейнага наведвальніка.
Запрашаем на ўрачыстае адкрыццё выставы работ выпускнікоў Глыбоцкай дзіцячай мастацкай школы ім. Я. Драздовіча, якое адбудзецца 29 мая ў 16.30 у выставачнай зале музея (вул. Маскоўская, 2).
Пазнаёміцца з творамі юных мастакоў можна будзе ў перыяд з 29 мая па 21 чэрвеня 2026 года. Паспейце наведаць!
9 мая наша краіна адзначае адну з самых значных і важных дат у сваёй гісторыі - Дзень Перамогі. Гэта дзень, калі ўся краіна прыгадвае гераізм і подзвіг свайго народа. Памяць аб страшнай вайне і Вялікай Перамозе не можа згаснуць: яна навечна ўпісана ў гісторыю Айчыны і кожнай беларускай сям'і. Перажытая трагедыя і дасягнутая Перамога - вечная крыніца болю і горычы, гонару і славы беларускага народа.
У гэты дзень у многіх музеях нашай краіны праводзяцца розныя тэматычныя мерапрыемствы. Глыбоцкі музей не стаў выключэннем. У гэты дзень мы працуем для Вас, паважаныя наведвальнікі.
Наш музей 15 мая запрашае правесці разам самую загадкава-таямнічую ноч года - "Ноч музеяў". Усе мерапрыемствы будуць праходзіць не толькі ў залах нашага музея з магчымасцю поўнага пагружэння ў гістарычную эпоху, але і ў музейным дворыку.
Наведванне ўсіх мерапрыемстваў бясплатнае, але капеечка ў кішэні можа спатрэбіцца. Прыходзьце, не пашкадуеце - гэта будзе асаблівы вечар!
Запрашаем усіх жадаючых прыняць удзел у адкрыцці часовай экспазіцыі "Хронікі Першамая". У экспазіцыйным рашэнні прадстаўлены экспанаты, якія апавядаюць пра гісторыю свята, перадавікоў вытворчасці, дасягненні прамысловасці і сельскай гаспадаркі, Героях Сацыялістычнай Працы. Пад лозунгам «Мір! Праца! Май» успомнім пра першамайскія дэманстрацыі і маёўкі, працоўныя акцыі і студатрады. Прыходзьце, будзе цікава!
У гісторыі нашага народа ёсць свята, якое можна назваць святым. Гэтае свята - Дзень Перамогі! Як многа ў гэтых словах. У іх гарката слёз і радасць перамог. Бо падзеі тых страшных гадоў закранулі практычна кожную савецкую сям'ю, кожнага чалавека. Дзень Перамогі - гэта боль і радасць нашых дарагіх ветэранаў і глыбокая падзяка сучаснікаў іх вялікаму подзвігу. Гэтая страшная вайна назаўжды застанецца ў нашай гісторыі і ў памяці чалавецтва. Усё больш і больш гадоў аддзяляюць нас ад падзей Вялікай Айчыннай вайны і ўсё менш становіцца відавочцаў гэтых падзей. І няхай прайшло ўжо некалькі дзесяцігоддзяў, але кожны год у пачатку мая па-ранейшаму ўсе мы з павагай і трапятаннем успамінаем подзвіг нашых бацькоў, дзядоў і прадзедаў і разам святкуем Вялікую Перамогу.
Запрашаем усіх жадаючых прыняць удзел у гульнявым даведніку, прымеркаваным да Міжнароднага дня помнікаў і гістарычных мясцін.
Займальнае мерапрыемства, прымеркаванае да 65-годдзя першага палёту чалавека ў космас, прапануем вучням 4-8 класаў школ раёна. На мерапрыемстве дзеці адправяцца ў касмічнае падарожжа па залах музея, падчас якога іх чакаюць розныя пазнавальныя віктарыны, забаўляльныя гульні і складаныя інтэлектуальныя заданні. Спадзяёмся, што камандная гульня спадабаецца кожнаму дзіцяці. Тэлефануйце, запісвайцеся і адпраўляйцеся пакараць космас разам з навуковымі супрацоўнікамі нашага музея.