“Мой адрас - Савецкі Саюз”
17 студзеня 2019 года ў музеі адбылася ўрачыстая прэзентацыя выставы “Мой адрас - Савецкі Саюз”, прымеркаванай да 100-годдзя ўтварэння БССР.
На сустрэчу з краінай СССР, каб успомніць сваю маладосць, юнацтва і дзяцінства сабралася шмат глыбачан. Супрацоўнікі музея пастараліся максімальна дакладна адлюстраваць эпоху таго часу і паўсталі перад наведвальнікамі ў вобразах сярэднестатыстычных савецкіх грамадзян. Душэўная размова пра прадметы, рэчы і сімвалы савецкай эпохі вялася нязмушана і па-хатняму. Успаміналі пра чэргі ў паліклінікі, крамы і цырульні, пра "блат" і "дэфіцыт". Гаварылі пра дасягненні і рэкорды "краіны Саветаў", пра таварна-грашовыя адносіны і многае іншае. 
Размова закранула і сістэму народнай адукацыі. Дарагімі сэрцу ўспамінамі пра сшыткі без палёў, пра прамакаткі, пра ранцы-партфелі, чарніліцы і іншыя школьныя прыналежнасці дзяліліся госці выставы. У інтэр'еры "хрушчоўкi" успаміналі пра планіроўку, расстаноўку і колькасць мэблі ў савецкіх кватэрах, пра суседзяў і ключах пад дыванком ля дзвярэй. Прыемным успамінам з мінулага стаў прагляд заставак папулярных тэлепраграм савецкага тэлебачання. І галоўнае, кожны, хто прыйшоў на выставу, змог паласавацца салодкім пачастункам, ад якога ў кожнага другога выпадалі пломбы - ірыскамі "Залаты ключык" і запіць яго 10-капеечнай дзіцячай радасцю - напіткам "Бураціна".
