У 2017 годзе ўжо ў пяты раз пройдзе ў нашым горадзе «Вішнёвы фестываль». Стала добрай традыцыяй у праграму фестывалю ўключаць конкурс баяністаў. Прытрымліваючыся гэтай традыцыі, 22 ліпеня на цэнтральнай плошчы нашага горада пройдзе чарговы конкурс пад назвай - «Вішнёвыя найгрышы». У гэты раз можна будзе не толькі пачуць меладычныя і заліхвацкія пералівы папулярнага ў народзе музычнага інструмента, але і ўбачыць старадаўнія гармонікі, баяны і акардэоны. Бо на працягу гэтага фестывальнага дня на галоўнай гарадской плошчы будзе працаваць унікальная выстава «А гармонік грае, грае ...».
На ёй будуць дэманстравацца музычныя інструменты, якія трымалі ў руках нашы дзяды і прадзеды. Самы малады экспанат гэтай выставы - акардэон Scandalli, выпушчаны вядомай італьянскай фірмай ў 1943 годзе. А многія інструменты гэтай выставы маюць куды больш прэстыжны ўзрост, паколькі былі створаны ў канцы 19 - пачатку 20 стагоддзя. Гэта і двухрадная гармонь «венка», і трохрадная «Петраградка», і першыя расійскія баяны, і папулярны нямецкі акардэон «Hohner». Адным словам, выстава зацікавіць не толькі музыкаў-прафесіяналаў, але і ўсіх, хто проста любіць слухаць гэты па-сапраўднаму народны інструмент.
Для жыхароў і гасцей нашага горада, хто па нейкіх прычынах не зможа падчас фестывалю наведаць выставу, мы прапануем пазнаёміцца з ёй у выставачнай зале нашага музея ўжо сёння. Знаходзіцца ў музеі яна будзе да канца жніўня. Чакаем Вас 22 ліпеня на цэнтральнай плошчы горада ці штодня ў нашым музеі!
14 лютага 2017 года ў сценах нашага музея адбылося ўрачыстае адкрыццё выставы "Рарытэты музеяў Дзісненшчыны". На ёй прадстаўлены ўнікальныя прадметы з фондаў некалькіх музеяў паўночна-заходняй часткі Віцебскай вобласці. Найбольш цікавыя экспанаты для гэтай выставы падрыхтавалі не толькі мы, але і супрацоўнікі Браслаўскага раённага аб'яднання музеяў, Германавіцкага мастацка-этнаграфічнага музея імя Я. Н. Драздовіча, Мёрскага гісторыка-этнаграфічнага музея. Сапраўдныя рарытэты прадставілі на выставу і вучні Міёрскай сярэдняй школы № 3. Са сваім настаўнікам Вітольдам Ермалёнкам яны стварылі чатыры школьных музеі, у якіх сабрана больш як 25 тысяч экспанатаў.
Падчас урачыстага адкрыцця выставы наведвальнікі змаглі не толькі пазнаёміцца з прадстаўленымі на ёй прадметамі і паслухаць цікавы расказ пра кожны рарытэт, але і даведацца пра тое, як звычайны прадмет становіцца музейным экспанатам. Пра сваю працу расказала галоўны захавальнік нашага музея Вольга Аляксандраўна Бахір, а пра спецыфіку захоўвання і вывучэння гістарычных дакументаў - дырэктар занальнага архіва г. Глыбокае Неля Аляксандраўна Баравік. Сваімі ўражаннямі пра ідэю арганізацыі і правядзенні такіх выстаў падзяліліся настаўнікі нашых школ: Наталля Францаўна Піваварава, Тэрэза Эдуардаўна Рабіза і Рыгор Леанідавіч Шарыпкін. Бо гэтыя людзі не па чутках ведаюць, што такое музей. Яны з'яўляюцца ініцыятарамі стварэння музеяў у сваіх школах. А яшчэ яны прапанавалі нам арганізаваць і правесці ў наступным годзе падобную выставу, толькі з унікальных прадметаў школьных музеяў і назваць яе “Рарытэты школьных музеяў Дзісненшчыны”.
Выстава будзе працаваць да 30 сакавіка. Мы запрашаем усіх жадаючых дакрануцца да рарытэтным прадметах нашай гісторыі.
30 студзеня 2015 года ў гарадскім Доме культуры адбылася ўрачыстасць, прысвечаная 75-годдзю ўтварэння Глыбоцкага раёна. Госці мерапрыемства змаглі пазнаёміцца з выставай “Глыбоцкаму раёну - 75 год”, якая працавала на свяце. Прадстаўленыя на ёй экспанаты акунулі наведвальнікаў у атмасферу савецкай эпохі, эпохі станаўлення і развіцця адміністрацыйна-тэрытарыяльнай адзінкі – Глыбоцкі раён.
У жніўні 2014 года ў музеі адкрылася тэматычная выстава "Першая сусветная вайна - фотафакт».
На ёй прадстаўлены фотаздымкі таго часу, на якіх захаваліся партрэты рускіх салдат. Акрамя фотаздымкаў на выставе прадстаўлены ўзнагародныя лісты нашага земляка, поўнага Георгіеўскага кавалера - Кучынскага Фёдара Сцяпанавіча.
Выстаўка працягнецца да канца жніўня.
Дзень Вялікай Кастрычніцкай Сацыялістычнай рэвалюцыі 7 лістапада адзначаўся ў СССР аж да 1991 года і лічыўся адным з самых галоўных святаў. У гэты дзень у 1917 годзе ў Петраградзе адбылося паўстанне пралетарыяту. Узброенымі матросамі, салдатамі і рабочымі была захоплена пошта, тэлеграф, тэлефон, а таксама Зімовы палац. Часовы ўрад быў звергнуты і аб'яўлена Улада Саветаў, якая праіснавала ў краіне каля сямідзесяці гадоў. Наступныя гады дзень 7 лістапада з'яўляўся дзяржаўным святам, «чырвоным днём календара», які адзначаўся масавымі дэманстрацыямі і ваенным парадам на галоўнай плошчы Масквы.
Для савецкіх людзей гэтае свята з'яўлялася яшчэ і падставай для сямейных і сяброўскіх зносін. Паштоўкі былі традыцыйнай формай віншаванняў у тыя часы. Гэта былі неад'емныя элементы перадсвяточнай атмасферы, своеасаблівыя «наладчыкі» на свята. Савецкую паштоўку, прысвечаную рэвалюцыі падпісвалі сябры, сваякі або блізкія людзі і адпраўлялі па пошце. Іх акуратна збіралі, беражліва захоўвалі многія пакаленні. Пасля таго, як Савецкі Саюз распаўся, а камуністычная партыя перастала з'яўляцца уладай, свята было адменена ў многіх рэспубліках былога Савецкага Саюза. Ва ўсякім выпадку, савецкая эпоха незваротна адышла ў мінулае. Сярод шматлікіх прадметаў таго часу нам засталіся ў спадчыну і паштоўкі, якія вельмі дакладна перадаюць атмасферу савецкіх святаў.
Паштоўкі і плакаты СССР дапамогуць нам захаваць гэтыя часы ў памяці. Рускія мастакі-ілюстратары добра пастараліся і стварылі па-сапраўднаму прыгожыя творы, на якія прыемна любавацца, што б яны сабой не сімвалізавалі.