26 кастрычніка 2018 года ў рамках святкавання 100-годдзя УЛКСМ прайшла выстава «Краіны маёй мінулая эпоха». На выставе былі прадстаўлены прадметы з фондаў Глыбоцкага гісторыка-этнаграфічнага музея, звязаныя з дзейнасцю Усесаюзнага Ленінскага камуністычнага саюза моладзі на Глыбоччыне: камсамольскія білеты і ўліковыя карткі, нагрудныя значкі, вымпелы і сцягі, камсамольскія пуцёўкі, дыпломы і ганаровыя граматы, кнігі, газеты, часопісы, брашуры. Гэтыя прадметы добра знаёмыя кожнаму, хто насіў на грудзях камсамольскі значок, і многае могуць расказаць сучаснай моладзі.
Асаблівасцю гэтай выставы стала тое, што яна стваралася пры актыўным удзеле нашых камсамольцаў. Сакратары райкама камсамола мінулых гадоў і актывісты гэтай арганізацыі падзяліліся фотаздымкамі, якія яны беражліва захоўваюць на працягу дзесяцігоддзяў. На пацямнелых ад часу фотакартках адлюстраваны моманты з жыцця нашых камсамольцаў: абласныя і раённыя з'езды, урачыстыя сходы, мітынгі, суботнікі, турыстычныя злёты і паходы, сустрэчы з ветэранамі, экскурсіі і многае іншае. Побач з чорна-белымі фотаздымкамі размясціліся і каляровыя здымкі, на якіх адлюстравана дзейнасць правапераемніка камсамола - Беларускага рэспубліканскага саюза моладзі.
Да 130-годдзя з дня нараджэння Язэпа Драздовіча наш музей падрыхтаваў цікавую выставу "Космас Беларуса”, урачыстае адкрыццё якой адбылося 10 кастрычніка 2018 года. Удзельнікі мерапрыемства змаглі здзейсніць унікальнае падарожжа па планетах сонечнай сістэмы з дапамогай мастацкіх работ касмічнай тэматыкі нашага знакамітага земляка. Марс, Венера, Сатурн і спадарожнік нашай планеты Месяц – вось пералік тых нябесных цел, на якіх змаглі пабываць госці нашага музея, дзякуючы незвычайнай фантазіі мастака Язэпа Драздовіча. Не проста пабываць, а і сустрэцца з карэннымі жыхарамі гэтых планет, убачыць іншапланетныя гарады і пасёлкі, любавацца незвычайнай прыродай іншых планет.
Усіх, хто жадае адправіцца ў касмічнае падарожжа з дзядзькам Язэпам, мы чакаем у музеі. Выстава будзе працаваць да канца кастрычніка.
Яны засталіся задаволеныя пасля сустрэчы з дыназаўрамі. А Вы?
Не згубіце свой шанец дакрануцца да свету таямнічага і нязведанага ...
1980-я ўвайшлі ў гісторыю як перыяд перабудовы, свабоды слова і галоснасці. З пазіцыі сённяшняга дня ёсць разнастайныя меркаванні наконт так званага “савецкага перыяду”. Прыярытэты раставіць час… Але для кагосьці гэта безклапотнае дзяцінства, пара шчаслівай маладосці, сталасці… Для некага, 80-я – гэта узлёт па кар’ернай лесвіцы, гэта знакавыя падзеі, прыёмныя знаёмствы і сустрэчы.
У кожнага рэгіёна свая гісторыя, свая адметнасць. Давайце ўзгадаем пра Глыбоччыну перыяду “нашых 80-х”.
5 мая 2018 года ў сценах музея гучалі дуды. Ва ўрачыстай абстаноўцы адкрылася выстава "Славацкія дуды ў ХХІ стагоддзі". Яна была арганізавана ў рамках Другога міжнароднага фэсту дударских рэгіёнаў «Дударскі рэй - 2018». Матэрыялы для выставы прадставіў удзельнік фэсту, дудар са Славакіі Лукаш Лацко. На ёй экспануюцца музычныя інструменты – беларуская дуда і славацкая гайда, а таксама шматлікая сувенірная і друкаваная прадукцыя, фота і відэаматэрыялы.
З 25 красавіка 2018 года ў музеі пачала працу выстава абразоў, створаных мастачкай з Маладзечна Ядвігай Сянько. Па благаславенню мітрапаліта Філарэта яна піша спісы з вядомых у праваслаўным свеце абразоў. Сярод яе прац ёсць таксама каталіцкія абразы, карціны на біблейскія сюжэты. Мастачка стварыла звыш 2 тысяч абразоў і карцін, якія можна ўбачыць у храмах Беларусі і за яе межамі. Яе работы захоўваюцца ў прыватных калекцыях у многіх краінах свету. З 2003 года ў розных гарадах Беларусі прайшло каля 200 персанальных выстаў мастачкі. Акрамя работ Ядвігі Сянько на выставе прадстаўлены ўнікальныя царкоўныя прадметы з музейных фондаў і запаснікаў касцёла Святой Тройцы ў Глыбокім.
Наш музей запрашае ўсіх жадаючых пазнаёміцца з выставай - гэта можна зрабіць як індывідуальна, так і ў складзе групы. Выстава будзе працаваць да 3 чэрвеня 2018 года.
14 сакавіка 2018 года адбылося ўрачыстае адкрыццё выставы "Атлантыда. Мігатлівыя скарбы Йонагуні», на якой глыбачане ўпершыню змаглі ўбачыць загадкавую Атлантыду. З таямнічымі экспанатамі выставы наведвальнікаў пазнаёміў прадстаўнік Японскага Цэнтра культуры і спорту «Дзэнрын Канкэй» (Добрасуседства) па краінах СНД Уладзіслаў Фамін-Асака. У экспазіцыі прадстаўлены прадметы з яго прыватнай калекцыі, прывезеныя з Японіі, Папуа-Новай Гвінеі, Гватэмалы і Шры-Ланкі. Людзі, якія сабраліся на адкрыццё змаглі адправіцца ў займальнае падарожжа па дне акіяна, сярод казачных і рэальных насельнікаў «царства ценяў», монстраў, зброі, ракавін і рытуальных масак, убачыць слана з чырвонага дрэва, “мабільнік” папуасаў, чароўнага дракона, вадзянога і многае іншае.
Усе, без выключэння, наведвальнікі выставы былі прыемна здзіўлены незвычайным святло-музычным афармленнем: інтэр'ер у стылі падводных містэрый пакрыты адмысловымі сумесямі светавых фарбаў. Гукі акіяна і мелодыі народаў свету ствараюць на выставе атмасферу спакою. Падводнае падарожжа, незабыўнае маляўнічае сэлфі, новыя эмоцыі - усё гэта чакае Вас на выставе-прывідзе, якая будзе працаваць да 15 красавіка!
У 2018 годзе святкаванне Дня абаронцы Айчыны стала юбілейным. Менавіта ў гэты дзень споўнілася 100 гадоў Узброеным Сілам Рэспублікі Беларусь, паколькі 23 лютага 1918 года пачаўся масавы запіс добраахвотнікаў у атрады Чырвонай Арміі, якія ствараліся згодна з дэкрэтам СНК РСФСР «Аб Рабоча-сялянскай Чырвонай арміі».
У сувязі з гэтай падзеяй у Гарадскім Доме культуры ў рамках правядзення ўрачыстага мерапрыемства працавала музейная выстава «Айчыне служым!". На ёй дэманстраваліся музейныя прадметы, звязаныя з бытам савецкіх салдат і афіцэраў. У першую чаргу гэта ваенная форма - шынялі, кіцелі і фуражкі 1970-80-х гадоў. Дэманстраваліся на выставе і шматлікія ўзнагароды, якімі заахвочваліся воіны савецкай арміі. Сярод іх былі прадстаўлены юбілейныя медалі, прысвечаныя гэтай падзеі - «30 гадоў Савецкай Арміі і Флоту», «60 гадоў Узброеных Сіл СССР», «70 гадоў Узброеных Сіл СССР», «90 год Узброеных Сіл Рэспублікі Беларусь". Вялікую цікавасць у наведвальнікаў выклікалі фотаздымкі салдат розных гадоў. Тут і саракавыя гады, на якіх зняты салдаты, перад адпраўленнем на фронт, і радасныя твары ў Дзень Перамогі, і фотаздымкі салдат і афіцэраў у пасляваенны час. На выставе гучалі вядомыя вайсковыя песні, якія стваралі святочную атмасферу.
У верасні 1939 года тэрыторыя сучаснага Глыбоцкага раёна ўвайшла ў склад БССР. 15 студзеня 1940 года Указам Прэзідыума Вярхоўнага Савета БССР “Аб стварэнні раёнаў у Баранавіцкай, Беластоцкай, Брэсцкай, Вілейскай і Пінскай абласцях Беларускай ССР” былі ўтвораны Глыбоцкі і Пліскі раёны, як адміністрацыйныя адзінкі Вілейскай вобласці.
Тэрыторыю Глыбоцкага раёна (592 кв. км.) склала былая воласць Глыбоцкая і частка Залескай воласці Дзісненскага павета. Насельніцтва раёна ў 1940 годзе налічвала 35099 чалавек (у горадзе пражывала 9650 чалавек).
Адначасова з раённым дзяленнем праводзілася работа па арганізацыі сельскіх саветаў як тэрытарыяльных адзінак, пры гэтым улічваліся межы землекарыстання, што было прадугледжана рашэннем Бюро ЦК КП(б)Б “Аб арганізацыі сельсаветаў у раёнах заходніх абласцей БССР” ад 29 студзеня 1940 года. Напрыклад, у склад Пліскага раёна ўвайшлі 18 сельскіх саветаў: Верацейскі, Валодзькаўскі, Галубіцкі, Драбаўшчынскі, Зашчэсленскі, Каралевіцкі, Кукроўскі, Кульгайскі, Лужкаўскі, Міцькаўскі, Асінаўскі, Востраўскі, Пліскі, Празароцкі, Прошкаўскі, Свільскі, Стральцоўскі, Вуглоўскі.
З 13 лістапада па 15 снежня 2017 года ў музеі працавала выстава “Вяртанне забытых кніг”, на якой экспанаваліся друкаваныя выданні з уласных фондаў. Увазе наведвальнікаў былі прадстаўленыя кнігі, часопісы і газеты розных гістарычных эпох, прычым большасць з іх выкарыстоўваліся менавіта жыхарамі Глыбоччыны. Гэта шматлікія падручнікі для школ і навучальных устаноў, мастацкія творы часоў Расійскай імперыі і Польскай Рэспублікі, кулінарныя кнігі пачатку ХХ стагоддзя, самая розная рэлігійная літаратура (малітоўнікі, царкоўна-народныя календары, спеўнікі), перыядычныя выданні на рускай, польскай, яўрэйскай і беларускай мовах. Былі на выставе і сапраўдныя рарытэты. Гэта – прыжыццёвыя выданні “Гісторыя беларускай (крыўскай) кнігі” Вацлава Ластоўскага і “Знахар” Тадэвуша Даленга-Мастовіча.